pazkoaldian

PAZKO HIRUHURRENA

EGUEN SANTUA

(Ps 115)

R/. Zure kalizak bat gaitu egin Jesukristoren odolarekin

Jaunari zer deutsot bihurtuko

egin deustazan guztiekaitik?

Salbamen-edontzia dot hartuko,

eta Jaunaren izena deituko.   R./

Jaunaren begietan balio handikoa

haren zintzoen herioa.

Zure neskamearen semea, zure morroi nozu, Jauna,

askatu dozuz nire kateak.   R/.

Eskainiko deutsut gores-oparia,

deituko dot, Jauna, zure izena.

Emongo deutsodaz Jaunari zin egindakoak,

herri guztia begira dagoela.   R/.

____________________________________

BARIKU SANTUA

R/. Zure eskuetan dot bizia; askatu naizu, Jaun handia

Zugaz batzen naz, Jauna, ez nadila behin ere lotsatu:

zeure zuzentasunez onik nagizu atara.

Zure eskuetan izten dot neure arnasa,

askatuko nozu, Jauna, Jainko leiala. R/.

Arerio guztiei barregarri najake, †

     auzoei irrigarri, ezagunei izugarri:

kalean ikusi eta alde dagie nigandik.

Hildakoa lez nabe bihotzean ahaztu,

ontzi baztertua lez naz geratu. R/.

Nik, ostera, Jauna, uste on Zugan dot,

«Zu zara nire Jainko», dinotsut.

Zure eskuan nire joan-etorriak,

atara nagizu arerioen eskutik, †

    aurrean narabilenakandik. R/.

Aurpegi argia erakutsi morroi honi,

salbatu nagizu zeure errukiaz.

Bizkortu zaiteze, izan bihotz,

Jaunagan uste on dozuen guztiok. R/.

____________________________________________

PAZKO BIJILIA

1) Sal 32, 4-5.6-7.12-13.20.22

EDO...

Zuzena da Jaunaren hitza,

leiala harek egin dauan guztia.

Zuzen eta bidezko dana dau maite,

haren graziaz lurra dago bete.   R/.

Jaunaren hitzak egin dauz zeruak,

haren aho-arnaseak izar mordoak.

Zaragian lez batu dauz itsas urak,

askan lez daukaz olatuak.   R/.

Bai dohatsu Jauna Jainko dauan jendea,

bere oinorde autatu dauan herria.

Begira dago Jauna zerutik,

gizon-emakume guztiengana adi-adi.  R/.

Gure bihotza Jaunaren zain daukagu,

lagun eta babes bera dogu.

Harengan pozten jaku barrua,

haren izen santuan dogu itxaropena.   R/.

2)  Ex 15, 1-2.3-4.5-6.17-18

Kanta deiogun Jaunari garai-garai dalako,

zaldi eta zaldun itsasora amildu dauzelako.

Jauna da nire indar eta kemen, *

bera izan da nire salbamen.

Hau dot nire Jainko, zabal dot goratuko, *

gurasoen Aita, bera nik ospatuko.   R/.

Gudari da Jauna,

Jauna dau berak izena.

Faraonen burdi eta gudariak *

itsasoan amildu dauz guztiak,

Itsas Gorrian ito, haren buruzagi handiak.   R/.

Ur-olatuek estaldu ebezan,

harri koskorra lez hondora joan ziran.

Zure eskumea, Jauna, bizkor harrigarria,

zure eskumeak, Jauna, birrintzen dau etsaia.   R/.

Sartu dozuz eta landatu zu jabe zaituen mendian,

zuk, Jauna, bizi izateko prestatu dozun tokian,

zure eskuek, Jauna, eregi eben jauretxean.

Jauna dogu errege, betidanik eta beti ere.   R/.

3) Sal 041

Nire gogoa Jainkoaz, Jainko biziaz egarri da, †

noiz noake Jainkoaren aurpegia ikustera?

Urtzen daukat barruan gogoa au gogoratuz:

Zelan joaten nintzan, jendetzaren aurrean,

Jainkoaren etxera, irrintzika ta goraka, jaitarrekin batera.   R/.

Bialdu zure argia eta zure egia, eurok eroan nagiela,

zure mendi santura, zure bizileku santura sartu naiela.

Eta sartuko naz Jainkoaren altarara, †

poz eta atsegin dodan Jainkoagana,

zitaraz goretsiko zaitut, Jauna, ene Jainkoa.   R/.

4) Sal 117

(edo)

Eskerrak Jaunari ona da-ta,

    haren maitasuna betikoa da-ta.

    Israel-etxeak hau esan begi:

    «Haren maitasuna betikoa».  R/.

«Jaunaren eskumeak jaso nau,

    Jaunaren eskumeak bizkor jokatu dau».

    Ez naz hilgo, bizi baino,

    Jaunaren eginak nik oihu egingo.   R/.

Etxegileek baztertutako harria

    berori bihurtu da giltzarria.

    Jaunak egin dau hori,

    gure begien harrigarri.   R/.

_________________________________________

BIZTUERAKO PAZKO DOMEKEA /A /B /C

R/. Hau da Jaunak egin dauan eguna,

     gu pozteko eta alaitzeko eguna.

edo Aleluia, aleluia, aleluia.

Eskerrak Jaunari, ona da-eta,

Haren maitasuna betikoa da-eta.

Israel etxeak hau esan begi:

«Haren maitasuna betikoa». R/.

«Jaunaren eskumeak nau jaso,

Jaunaren eskumeak bizkor dau jokatu».

Hil ez, bizi egingo naz,

Jaunaren eginak nik iragarriko. R/.

Etxegileek baztertutako harria,

berori da giltzarria.

Jaunak egin dau hori,

gure begien harrigarri. R/.

_________________________________________

PAZKO BIGARRENA  /A

Sal 117, 2-4. 13-15. 22-24

R/.     Eskerrak Jaunari, ona da-eta,

              Haren maitasuna betikoa da-eta.

edo Aleluia.

Israel etxeak hau esan begi:

«Haren maitasuna betikoa».

Aaron etxeak hau esan begi:

«Haren maitasuna betikoa».

Esan begie Jaunaren bildur direnek:

«Haren maitasuna betikoa». R/.

Gogor bultzatu ninduen jausteko,

han egoan Jauna ni laguntzeko.

Nire indar eta nire kemen Jauna,

Ha da nire salbamena.

Poz eta garaipen-oihuak

zintzoen txabolan. R/.

Etxegileek baztertutako harria,

berori egin da giltzarria.

Jaunak egin dau hori,

gure begien harrigarri.

Hau da Jaunak egin dauan eguna,

gu pozteko eta alaitzeko eguna. R/.

________________________________________

PAZKOALDIKO HIRUGARREN DOMEKEA /A

Sal 15, 1-2a eta 5. 7-8. 9-10. 11

R/.    Bizirako bidea erakutsiko deustazu, Jauna.

edo Aleluia.

Zaindu nagizu, Jauna,

babes bila nator-eta Zugana.

Honan dinotsot Jaunari: «Zeu zaitut nire Jauna»

Jauna da nire ondare eta edontzia;

Zuk dozu eskuetan nire zoria. R/.

Onesten dot Jauna, aholkua emon deustalako,

gauez ere neure bihotzak oharrazoten naualako.

Begi aurrean ipinten dot beti Jauna;

eskuman dodala, ez naiteke dardara. R/.

Horregaitik, alai dot bihotza, pozik barrua,

haragi honek ere bakean dau atsedena.

Ez dozu-eta nire bizia Leizera jaurtiko,

ezta zure zintzoa ustelak hartzen itziko. R/.

Bizirako bidea erakutsiko deustazu:

alaitasun betea zeure aurrean,

betiko atseginak zeure eskuman. R/.

____________________________________

PAZKOALDIKO LAUGARREN DOMEKEA

Sal 22, 1-3. 4. 5. 6

R/. Jauna dot artzain, ez naz ezeren beharrean.

Jauna dot artzain, ez naz ezeren beharrizanean;

larre gurietan etzunazoten nau,

ur-bazter nasaira eroaten

eta indarrak barritzen;

bide segurutik naroa,

bere izenari ohore eginez. R/.

Ibar baltz-ilunean banabil ere,

ez naz gaitzaren bildur,

Zu nigaz zagoz-eta:

zure artzain-makileak nasaitzen nau. R/.

Mahaia atontzen deustazu

arerioen begi-bistan;

orioz igurtziten deustazu burua,

gainezka dot kopea. R/.

Zoriona eta maitasuna ditut lagun,

bizitzako egun guztietan,

eta Jaunaren etxean biziko naz

amaibako egunetan. R/.

_________________________________

>

PAZKOALDIKO BOSTGARREN DOMEKEA

Sal 32, 1-2. 4-5. 18-19

R/.    Betor gugana, Jauna, zure maitasuna,

Zugan dogu-eta gure uste ona.

Poztu zaiteze, zintzoak, Jaunagan,

zuzenak diranei jagoke Ha goratzea.

Ospatu egizue Jauna kitaraz,

egiozue soinu hamar hariko salterioaz. R/.

Zuzena da-eta Jaunaren berbea,

leiala Harek egin dauan guztia.

Zuzena eta bidezkoa dana dau maite,

Haren graziaz lurra dago bete. R/.

Hara, Jaunaren begiak bildur deutsoenakana,

Haren maitasuna itxaron dabenengana;

hareek ditu-eta heriotzatik atarako,

eta gosetean aseko. R/.

___________________________________

PAZKOALDIKO SEIGARREN DOMEKEA

Sal 65, 1-3a. 4-5. 6-7a. 16 eta 20

R/.    Lur osoa, egiozu irrintzi Jainkoari.

Lur osoa, egiozu irrintzi Jainkoari,

egin eresi Haren izen ederrari,

emon goralpen eder Berari.

Esan Jainkoari: «Zuk eginak bai dirala harrigarriak!» R/.

Ahuspeztu bedi lur osoa zure aurrean eresi eginez,

zure izenari eresi eginez.

Zatoze eta ikusi Jainkoaren lanak,

harritzeko dira-eta gizakiakaitik egin dituanak. R/.

Itsasoa lehor bihurtu dau,

oinez igaro dira ibaiaren erditik;

beraz, poztu gaitezan Haregaz.

Nagusi da ahal izatez betiko. R/.

Zatoze eta entzun, Jainkoaren bildur zareenok,

esango deutsuedaz nire alde Harek eginak.

Bedeinkatua Jainkoa, ez dau-eta uxatu nire eskaria,

ez deust-eta ukatu bere grazia. R/.

________________________________

JAUNAREN IGOKUNDEA  /A  /B  /C

Sal 46, 2-3. 6-7. 8-9

R/. Oihu alaien artean igon dau Jainkoak,

turuta-soinuz, Jaunak.

edo    Aleluia.

Herri guztiok, txalo jo egizue,

Jainkoari irrintzi egiozue.

Goi-goiko Jauna, izan ere, izugarri,

lurbira osoan errege handi. R/.

Oihu alaien artean igon dau Jainkoak,

turuta-soinuz, Jaunak.

Eresi Jainkoari, eresi;

eresi gure erregeari, eresi. R/.

Jainkoa da-eta lurbira osoan errege,

egiozue jator goratzarre.

Jainkoa errege da atzerrietan,

jesarrita dago Jainkoa bere aurki santuan. R/.

_________________________

PENTEKOSTE

Sal 103, 1-2a. 24 eta 35c. 27-28. 29-30

R/.  Bialdu egizu, Jauna, zeure arnasea,

eta barrituazo lur-azala.

edo Aleluia.

Ene arima, goratu egizu Jauna!

Guztiz handi zaitut, Jauna, ene Jainkoa!

Handi eta eder zagoz jantzita,

estalki dozu argia. R/.

Bai ugari dirala, Jauna, Zuk eginak,

zuhurtasunez eginak zeharo,

lurra zure sorkariz betea dago!

Ene arima, goratu egizu Jauna! R/.

Horreek guztiak begira dozuz,

sasoi onez jana emon deiezun.

Zuk emonik hartzen dabe,

Zuk eskua zabalduz onez aserik dagoz. R/.

Aurpegia gordeten badozu, ikara dira,

arnasea kentzen badeutsezu, hilten,

euren hautsetara dira bihurtzen.

Zeure arnasea bialtzen badozu,

izatea emoten deutsezu;

lur-azala barriazoten dozu. R/.

_______________________________

HIRUTASUN GUZTIZ SANTUA

Dn 3, 52. 53-54. 55-56

R/.    Aintza eta gorespen Zuri gizaldietan

Bedeinkatua zu, Jauna, gure arbasoen Jainkoa,

goratua gizaldien gizaldietan!.

Bedeinkatua zu, santu eta ospatzu zarana,

goretsia eta goratua gizaldien gizaldietan!   R/.

Bedeinkatua zu, tenpluan zeure ospea agertzen dozuna,

goratua gizaldien gizaldietan!

Bedeinkatua zu, kerubinen gainean jesarririk,

leizeak arakatzen dozuzana, goratua gizaldien gizaldietan!   R/.

Bedeinkatua zu, errege-tronuan jesarrita zagozana,

goratua gizaldien gizaldietan!

Bedeinkatua zu, zeru-sabaian,

goratua gizaldien gizaldietan!   R/.

___________________________________

KRISTOREN GORPUTZ-ODOLAK

Sal 147, 12-13. 14-15. 19-20

R/. Jerusalem, ospatu egizu Jauna

Jerusalem, ospatu egizu Jauna,

Sion, goratu zeure Jainkoa.

Zure ateen sarrailak indartu ditu-eta

eta seme-alabak zure barruan bedeinkatu.  R/.

Jerusalem, ospatu egizu Jauna,

Sion, goratu zeure Jainkoa.

Zure ateen sarrailak indartu ditu-eta

eta seme-alabak zure barruan bedeinkatu.  R/.

Zure mugetan bakea ezarri dau,

garirik onenaz ase zaitu.

Bialtzen dau lurrera bere mezua,

eta haren hitza bizkor eta arin doa.  R/.

Bere hitza iragarri deutso Jakoben herriari, 

bere erabagi eta aginduak Israeli.

Beste herriei ez deutse holakorik egin,

bere erabagirik ez deutse jakinarazo.  R/.